Последний визит: 2021-11-14 14:24:29
Сейчас не в сети

Сінокосы у Березниках

СІНОКОСЫ У БЕРЕЗНИКАХ
Ґаздови треба было мати много земли и худобы. Давно казали: «Уто пустый чулувік, що ниє у нього маржины». Но уту зимлю мав ділити межи своїми дітьми. Мôжу навести приклад на моюму прадідови Петрови, котрый мав семеро діти и усю зимлю ділив межи ними. Моя прабаба мала приділ у Росўшному, Погари, Лыси и у Чиртижі.
Начинали косити не ранше Иля. Першого дне ґазда ишôв прокôшовати. Прокôшовав там де мала быти колиба тай ид кырници. Дале ишла робота. Чулувік вів из собов худôбу и робив колибу из сіна авать валўв. Снаряддьом были: косы, граблі, вилкы, нôші, які рубали из ліщанкы, великі вилы. Жона каждого дне ходила думўв, бо треба было зварити їсти, спечи хліба и на рано вынести їсти. Кить была мала дітина та носила ї из собôв. Май часто выносила молоко, сыр, булі. Ґазда не рідко варив на коцці чир. Жона з дôмўв ищи приносила левиш у кандирьови и лажок из молоком.
Ґаздови треба было покосити, а жоні позрібати, складати у пласты и сушити. Старші діти помагали изношовати пласты ид недоберкови. Кой усьо досушили митали копицю. Дале переходили на другый участок.
Кўнчалося кôшіня на першу Матку. Но часто косили и по Покровах, особенно утў, тко вернувся из полонины. Сіна треба было много. Єднўй кôзі и вўци на зиму треба было вўз сіна, а у каждого было дись по двадцять овиць и кўз неговôрячи уже за корўв и волўв. Но яка была велика польза из худобы! Наприклад, за двадцять овиць, якых давали на полонину, получали пятнадціть будинкўв сыра. Ягнячу кішку надівали на ребуны; из вôвны чинили хôвпакы, холошні, гойоші, петек, гуні. Исе усьо мали пўдготовити до осени. Коням даже приходило бегево у катуны. Казала чилядь: « Узяли коня, та служит так ги чилядник…».
Після сінокосўв діти язали дома худобу и ишли пўдчищати. Люде у хамниках рубали дерева и пущали їх на спіціальні валовы, якыми спущали дерево удолину. Из рунины волы тягнули думўв. Не мош забывати, що у яри садили по коцках вільхы, пўд якыми май хотіла рости трава. Туму дрыва мош было наготовити и на своих приділах.
У зимі на возах возили сіно. И у исю пôру гнали худобу у хащу. Гнали у зворины, бо там была ожина, яку уббивали выд снігу, убы маржина могла її їсти.

Опубликовано: 2017-08-09 19:09:13
Количество просмотров: 383
Комментировать публикации могут только зарегистрированные пользователи. Регистрация / Вход

Комментарии